সাংস্কৃতিক অনুষ্ঠানটিত সমল ব্যক্তি হিচাবে উপস্থিত থাকি বিশিষ্ট ঝুমইৰ গুৰু ভদ্ৰ ৰাজৱাৰে কয় যে অসমৰ আদিবাসী চাহ জনগোষ্ঠীৰ মাজত প্ৰচলিত বিভিন্ন পূজা পাৰ্বণ, বিয়া বাৰু আদিত সৰ্বাধিক কুড়মালি গীতৰ প্ৰচলন দেখা যায়। কৰম পৰৱৰ গীত ,চহৰাই পৰৱৰ গীত, টুচু পৰৱৰ গীত, বিয়া গীত আদি কুড়মালি লোকগীত সমূহ কুড়মি, ৰাজৱাৰ ,পান, তাঁতী, কুমাৰ, গোৱালা, কামহাৰ বা লোহাৰ, কৈৰী,বেদীয়া, ঘাটোৱাৰ, তেলী, নায়ক,মুচি, ডম, ঘাঁচি আদি বিভিন্ন জাতি জনজাতিৰ মাজত পৌৰাণিক দিনৰ পৰাই প্ৰচলিত হৈ আহিছে। বৰ্তমান কিছুমান নবীন শিল্পীয়ে মিশ্ৰিত ৰূপত আৰু অশ্লীল শব্দ প্ৰয়োগ কৰি এই গীতসমূহৰ প্ৰকৃত সুৰ-তাল-মাত্ৰা আদি বিকৃত কৰিবলৈ চেষ্টা কৰিছে, যিটো অত্যন্ত দুখজনক কথা।
বিশিষ্ট সাহিত্যিক,গৱেষক সঞ্জয় কুমাৰ তাঁতীয়ে কুড়মালি ভাষাৰ ইতিহাস সম্বন্ধে মন্তব্যত কয় যে কুড়মালি ভাষাটো এক অতি পুৰণি ভাষা। সময়ত মধ্যভাৰতৰ বৃহৎ ছোটানাগপুৰ অঞ্চলত বিভিন্ন আদিম জাতি জনজাতিৰ সাংস্কৃতিক চৰ্চা আৰু বিনিময় মাধ্যমৰ সংযোগী ভাষা হিচাপে আছিল। বৰ্তমানো সেই অঞ্চলৰ পৰা অসমলৈ অহা বিভিন্ন জাতিগোষ্ঠীৰ বৃহৎ সংখ্যক লোকৰ মাজত কুড়মালি ভাষাটো প্ৰচলিত হৈ আছে।অসমত কিছু মিশ্ৰিত ৰূপত কুড়মালি ভাষাটো প্ৰচলিত হৈ আছে, যদিও তেওঁলোকৰ পৰম্পৰাগত লোকগীত সমূহ বৰ্তমানো বৰ্তি আছে। সেয়ে এই সমূহক সংৰক্ষণ আৰু চৰ্চা কৰিবলৈ তেখেতে কুড়মালি সাহিত্য সভাক আহ্বান জনায়। এই লোকগীত সমূহৰ বিষয়বস্তু, সুৰ-তাল-মানৰ ওপৰতো এক বস্তুনিষ্ঠ গৱেষণাৰো তেখেতে পোষকতা কৰে। আনহাতে এই লোকগীত সমূহক অসমৰ মানুহৰ মাজত প্ৰচাৰ আৰু বিনিময় হোৱাৰো প্ৰয়োজন বুলি তেখেতে তেখেতৰ মন্তব্যত প্ৰকাশ কৰে।
কুড়মালি সাহিত্য সভাৰ প্ৰতিষ্ঠাপক সম্পাদক জীৱন জ্যোতি কুড়মিয়ে কুড়মালি লোকগীতৰ বিশেষ কৰ্মশালা অনুষ্ঠিত কৰাৰ প্ৰস্তাৱ আগবঢ়ায়।
সাংস্কৃতিক অনুষ্ঠানত অংশগ্ৰহণ কৰি অসমৰ স্বনামধন্য শিল্পী মকৰ সিং ভুমিজ, সুবীল বাৰ্গ, বিশ্বকৰ্মা কাঁৱাৰ, বাবা কুড়মি আদিয়ে গীত পৰিৱেশন কৰি সকলোকে আপ্লুত কৰে। অনুষ্ঠানত বিশিষ্ট লেখক-লেখিকা ভাষা সাহিত্যৰ গৱেষণাৰ ছাত্ৰ ছাত্ৰীৰ লগতে সাহিত্য সভাৰ বিষয়ববীয়া উপস্থিত থাকে।কুড়মালি সাহিত্য সভাৰ কেন্দ্ৰীয় সাংস্কৃতিক সম্পাদক তিলেশ্বৰ কুড়মিয়ে "ৰিমি ঝিমি" অনুষ্ঠানটোত অংশগ্ৰহণ কৰি গীত পৰিৱেশন কৰা সকলো শিল্পীকে সমিতিৰ তৰফৰ পৰা সম্বৰ্ধনা পত্ৰ আগবঢ়োৱাৰ কথা ঘোষণা কৰে।