আজি আমি পাতিবলগীয়া বিষয়টো হৈছে বাগিচাত শ্ৰমিকক কৰ্মস্থলীত কতৃপক্ষই যোগান ধৰা খোৱা পানী । এই পানীখিনি এক নিৰ্দিষ্ট ঠাইত উতলাই শ্ৰমিক সকলক যোগান ধৰা হয় । বেছি ভাগ বাগিচাতেই পানী উতলা ঠাই টুকুৰাত অস্বাস্থ্যকৰ পৰিৱেশ এটা দেখা যায় । তদুপৰি পানীৱালাবিলাকে পানীখিনি কৰ্মস্থলীলৈ লৈ যাওঁতে বিৰীয়া এডালত দুটা উন্মুক্ত ড্ৰাম বা দুটি বগী টিঙত ভাৰ বান্ধি লৈ যোৱা দেখা যায় । কেতিয়াবা ঢাকোন হিচাবে কলপাত দিয়া দেখা যায় যদিও উতলা পানীৰ ভাপ লাগি জ্বলি মেৰ খাই পৰে । ধূলি-মাকতি , চকুৰে মনিব নোৱাৰা বীজাণু আৰু ক'ত কি ... পাছৰখিনি আপোনাসবে বুজি পাইছেই । লগতে ডাঠকৈ চাহ পাত আৰু মুঠি মুঠিকৈ নিমখ । পিয়াহত আতুৰ শ্ৰমিকে নি:সন্দেহ এই পানীখিনি খায়েই পিয়াহ গুচাই । কিন্তু তাৰ পিছত ...
আজি-কালি বহু ঠাইত টেংকীত পানী যোগান ধৰা দেখা যায় । যদিহে টেংকীৰ পৰিষ্কাৰ-পৰিচ্ছন্নতাৰ প্ৰতি গুৰুত্ব দিয়া নাযায় । তেন্তে এই ব্যৱস্থাও শ্ৰমিকৰ শৰীৰৰ প্ৰতি নি:সন্দেহ ভাবুকি সৃষ্টি কৰাৰ থল আছে ।
দেহা থাকিলেহে বেহা । শ্ৰমিকসকল সুস্থ হৈ থাকিলে অধিক শ্ৰমদান কৰিব পাৰিব । উৎপাদনো বেছি হ'ব । তেন্তে তাহানিৰেই পৰা দেহা-মগজু ভঙাৰ এই শ্ল' পয়জন কিয় ... ???
চাহৰ বাবে অসম বিখ্যাত হোৱাৰ লগতে অসমৰ অৰ্থনৈতিক ভেটিও টনকীয়াল হ'ল । কিন্তু আজিও এইসকল শ্ৰমিকে সকলো দিশতেই অৱহেলিত । আনকি এটুপি খোৱা পানীৰ পৰাও বঞ্চিত । আমি দেখা পাওঁ যে - চাহ শিল্পৰ লগত জড়িত সুবিধাবাদী সকলে দামীৰো দামী ফিল্টাৰৰ পানী খাই হৃদ-পুষ্ট হৈ থাকে । আমি অনুভৱ কৰিছো দেশৰ অৰ্থনীতিৰ ভঁৰাল বৃদ্ধি কৰাত সক্ৰিয় ভূমিকা গ্ৰহণ কৰা এই শ্ৰমিক সকলৰ বিশুদ্ধ খোৱা পানীৰ বাবে চৰকাৰে চাহ কতৃপক্ষক শ্ৰমিকৰ কৰ্মস্থলীত ফিল্টাৰৰ ব্যৱস্থা কৰিবলৈ বাধ্য কৰাব লাগে । লগতে চৰকাৰে শ্ৰমিকক চাইকেল, মবাইল আদি আঁচনি দিয়াতকৈ ঘৰে প্ৰতি একোটাকৈ ফিল্টাৰ দিয়াৰ ব্যৱস্থা কৰিলে শ্ৰমিক সকল অধিক উপকৃত হোৱাৰ থল আছে । কাৰণ স্বাস্থ্যই পৰম ধন ...
🖋️ৰীতা গোৱালা